Saudiya Arabistonidagi yirik neft ishdan chiqdi. Bu global oqibatlarga olib kelishi mumkin

Saudiya Arabistonidagi yirik neft quvuri bir necha haftaga ishdan chiqdi. Bu global oqibatlarga olib kelishi mumkin.

Neft sanoatidagi ma’lumotlarga ko‘ra, zararlangan «Sharq — G‘arb» neft quvurini ta’mirlash ishlari besh-olti haftagacha davom etishi mumkin. Riyoz hozircha ta’mirlash ishlarining rasmiy muddatlarini ma’lum qilmagan.

Dronlar hujumi natijasida neft quvurining nasos stansiyalari zararlangan. Sputnik tasvirlarida bir nechta ob’ektda jiddiy shikastlanishlar ko‘ringan. Saudiya Arabistoni ma’lumotlariga ko‘ra, hujumlar oqibatida jabrlanganlar bor.

Hujumlar ortida kim turgani hozircha rasman aniqlanmagan. Saudiya Arabistoni va Iroq dronlar Iroq hududidan uchirilganini bildirgan. Bag‘dod hukumati tergov boshlagan. Ilgari esa hujumni Yaman husiylari amalga oshirgan bo‘lishi mumkinligi taxmin qilingan edi.

Neft sanoati vakillari quvur uzoq vaqt ishlamay qolsa, jahon bozori neft ta’minotining sezilarli qismidan mahrum bo‘lishi mumkinligidan xavotirda.

So‘nggi vaqtlarda «Sharq — G‘arb» neft quvuri orqali kuniga taxminan 4–5 million barrel neft tashilgan. Bu jahondagi neft taklifining 5 foizigacha bo‘lgan qismni tashkil etadi.

Treyderlar va Saudiya neftini sotib oluvchilar ma’lumotiga ko‘ra, Yanbu portidagi neft zaxiralari atigi 5–7 kunga yetishi mumkin. Agar shu vaqtga qadar quvurni hech bo‘lmasa qisman ishga tushirish imkoni bo‘lmasa, eksport hajmi sezilarli darajada qisqarishi mumkin.

Bozor hozirning o‘zidayoq xavotir bilan reaksiya bildirmoqda: neft narxlari ko‘tarilmoqda. Ekspertlar quvurning yanada uzoq vaqt ishlamay turishi yoqilg‘i narxlarining yanada oshishiga olib kelishi mumkinligidan ogohlantirmoqda.