Rossiya va AQSh delegasiyalari o‘rtasida ikkinchi uchrashuvga tayyorgarlik ko‘rilmoqda – Sergey Lavrov

"Istanbulda birinchi uchrashuv bo‘lib o‘tgandi. Hozir ikkinchisiga tayyorlanyapmiz. Shu bilan birga, telefon va videokonferensiya orqali aloqalar davom etmoqda. Biz ma’lum bir ijobiy o‘zgarishlarni ko‘ryapmiz", — deya aniqlik kiritdi Rossiya TIV rahbari.

Lavrovning so‘zlariga ko‘ra, Moskva va Vashington har ikki davlat prezidentlari ma’qullagan holda elchixonalar ishiga jiddiy to‘siq bo‘layotgan "yirik muammolarni bartaraf etish" masalasida ish olib bormoqda.

Shuningdek, Lavrovning aytishicha, AQSh Rossiyaning “Qora dengiz kelishuvi” bo‘yicha shartlarini o‘rganmoqda va yaqin vaqt ichida o‘z munosabatini bildirishi kutilmoqda.

Eslatib o‘tamiz, Qora dengizda o‘t ochishni to‘xtatish uchun Rossiya hukumati qishloq xo‘jaligi mahsulotlari va o‘g‘itlari eksportiga qo‘yilgan sanksiyalarni bekor qilishni talab qilmoqda.