Rossiya Ukraina bo‘yicha muzokaralarni davom ettirishga ochiq

Rossiya Ukrainadagi mojaroni tinch yo‘l bilan hal qilish bo‘yicha muzokaralarni davom ettirishga tayyor, ammo Rossiya, AQSh va Ukraina vakillarining navbatdagi uchrashuvi bo‘yicha hozircha aniq reja yo‘q. Bu haqda Rossiya prezidenti matbuot kotibi Dmitriy Peskov jurnalistlarga ma’lum qildi. "Hozirda muzokaralarning keyingi raundini o‘tkazish bo‘yicha aniq rejalar va muddatlar haqida ma’lumotga ega emasman", — dedi u. Avvalroq Vladimir Zelenskiy idorasi rahbari Kirill Budanov* Kiyev Ukrainadagi mojaroni hal qilish bo‘yicha muzokaralar mavzusini jonlantirishga urinib ko‘rmoqchi ekanligini aytgan edi. Peskov Rossiya tinchlik muzokaralarini davom ettirishga ochiqligini, Moskva va Vashington o‘rtasida ishchi darajadagi aloqalar saqlanayotganini ta’kidladi. Uning so‘zlariga ko‘ra, Rossiya o‘z maqsadlariga tinch yo‘l bilan erishishni afzal ko‘radi. Buning imkoni bo‘lmasa, maxsus harbiy operasiya davom ettiriladi. Kreml vakili muzlatilgan Rossiya aktivlaridan Ukrainani qo‘llab-quvvatlash uchun foydalanish tashabbusiga ham munosabat bildirdi. Peskov bunday harakatlarni noqonuniy deb atab, ular huquqiy oqibatlarga olib kelishini aytdi. Ushbu tashabbus Shvesiya, Niderlandiya, Ispaniya va Polsha tomonidan ilgari surilmoqda. Peskov Rossiyaning NATOga qarshi harbiy rejalari borligi haqidagi xabarlarni ham rad etdi. Uning ta’kidlashicha, bunday xabarlar haqiqatga va Rossiyaning niyatlariga aloqador emas. Aksincha, Moskva Yevropa davlatlarining Rossiyaga nisbatan tajovuzkor siyosatiga duch kelmoqda. Avvalroq Peskov Rossiya va AQSh maxsus xizmatlari o‘rtasidagi aloqalar hatto ikki tomonlama munosabatlarning eng murakkab davrlarida ham davom etishini ma’lum qilgan edi. U Markaziy razvedka boshqarmasi direktori Jon Retkliffning Moskvaga tashrifi doirasida o‘tkazilgan bunday muloqotlarni ijobiy jarayon deb atadi.