Rossiya harbiy dronlar sinovi uchun bolalardan foydalanmoqda

The Guardian nashri Rossiya bolalarini dronlar ishlab chiqarish va sinov jarayonlariga jalb etayotgani haqida surishtiruv natijalarini e’lon qildi.

Unda bolalar videoo‘yin va musobaqalar orqali tanlab olinayotgani ma’lum qilingan.

The Guardian nashri ma’lumotiga ko‘ra, Rossiya hukumati bolalarni dronlar ishlab chiqarish va sinov ishlariga jalb qilmoqda. Bu jarayonda avvalo o‘quvchilar «Berloga» nomli onlayn o‘yinda ishtirok etadi. Unda qatnashchilar dronlar yordamida virtual himoya vazifalarini bajaradi. Muvaffaqiyat qozonganlar oliy ta’lim muassasalariga kirishda imtiyozli balllar bilan taqdirlanadi.

Shundan so‘ng, eng iqtidorli o‘quvchilar “Big Challenges” kabi murakkab tanlovlarga jalb qilinadi. Bu orqali ular xalqaro sanksiyalar ostidagi harbiy-sanoat kompaniyalari tomonidan saralab olinadi. Yoshlar bu korxonalarda turli turdagi dronlar uchun texnik qismlarni loyihalashda faol ishtirok etadi.

Tahlillarga ko‘ra, Rossiya dronlar ishlab chiqarishini strategik ustuvor yo‘nalish sifatida belgilagan. Prezident Vladimir Putin bu sohadagi ishlarni tezlashtirish zarurligini ta’kidlagan. Shu bilan birga, dronlar texnologiyasi tez o‘zgarib borayotgani sabab, har ikki tomon ham ularga yangi imkoniyatlar qo‘shish ustida ish olib bormoqda.

The Insider nashri ma’lumotiga ko‘ra, tanlovlarda ishtirok etgan bolalar dronlar harbiy maqsadda qo‘llanishini bilgan. Ba’zilari dastlab fuqarolik maqsadlariga xizmat qiluvchi loyihalar ustida ishlayotganini aytgan. Bir o‘quvchi:

«Bizga bu urush uchun kerakligini aytish mumkin emas edi. Shuning uchun fuqarolik yo‘nalishini ko‘rsatdik», — degan.

Shu bilan birga, xalqaro qonunlarga ko‘ra, bolalarni harbiy ob’ektlarda ishlatish taqiqlangan. Ammo Rossiyaning ushbu amaliyoti bir qator xalqaro konvensiyalarga zid keladi. Ayniqsa, frontda FPV dronlar kabi halokatli qurollar keng qo‘llanilayotgan sharoitda bu holat jiddiy tashvish uyg‘otmoqda.