Rossiya diplomatlari Suriya bilan munosabatlarni yaxshilash uchun yo‘lga chiqdi

Rossiya O‘rta yer dengizi sohili yaqinidagi Tartus harbiy-dengiz bazasi va havo bazasini saqlab qolishga intilmoqda. Suriyaning yangi rahbari Ahmad al-Sharaa Moskvaga sodiq diktator Bashar Asadning ag‘darilishiga qaramay, Rossiya kuchlarini chiqarib yuborish to‘g‘risida buyruq bermadi.

Seshanba kuni rossiyalik diplomatlar sobiq diktator Bashar Asad dekabr oyida ag‘darilganidan beri birinchi marta Suriyaga bordi.

Moskva Asad rejimining asosiy ittifoqchisi bo‘lgan va Suriyada ikkita harbiy bazaga ega.

Rossiyaning RIA Novosti davlat axborot agentligi xabar berishicha, Rossiya delegasiyasi tarkibiga Tashqi ishlar vaziri o‘rinbosari Mixail Bogdanov va Suriya bo‘yicha maxsus vakil Aleksandr Lavrentev kirgan.

Rossiyaning RT davlat teleradiokompaniyasi va Suriyaning yarim rasmiy "Al-Vatan" gazetasi xabar qilishicha, Rossiya delegasiyasi Suriyaning yangi rahbari Ahmad al-Sharaa bilan uchrashadi.

Dekabr oyi oxirida Saudiya Arabistonining "Al-Arabiya" davlat telekanaliga bergan intervyusida al-Sharaa Moskva va Damashq o‘rtasidagi mustahkam strategik aloqalarni ta’kidladi.

"Suriyaning barcha qurol-yarog‘lari rus ishlab chiqarishi bo‘lib, ko‘plab elektr stantsiyalari rus mutaxassislari tomonidan boshqariladi... Biz Rossiyaning ba’zilar xohlagan usulda Suriyani tark etishini istamaymiz," - dedi u, "Rossiya va Suriya o‘rtasidagi chuqur strategik manfaatlar" mavjudligini ta’kidlab.

Ukraina tashqi ishlar vaziri Andriy Sibiga dekabr oyida Suriyaga tashrif buyurib, mamlakatning yangi rahbarlarini Rossiya kuchlarini chiqarib yuborishga undadi va bunday qadam Yaqin Sharqda "barqarorlikka" hissa qo‘shishini ta’kidladi.

Dushanba kuni Yevropa Ittifoqi tashqi ishlar vazirlari Yevropa Ittifoqi, Germaniya va Fransiya vakillarining Damashqqa tashrifi so‘ngida Suriyaga nisbatan sanksiyalarni yumshatishni boshlashga kelishib oldi.