Rossiya hukumati xorijga benzin yetkazib berishni nafaqat butun avgust oyi, balki 2024 yilning sentyabr va oktyabr oylarida ham taqiqladi. Bu haqda Rossiya Davlat dumasida chiqish qilgan energetika vaziri o‘rinbosari Pavel Sorokin ma’lum qildi.
Uning so‘zlariga ko‘ra, bu qaror ichki yoqilg‘i bozoridagi o‘zgaruvchanlik va benzin narxining keskin oshishiga yo‘l qo‘ymaslik uchun qabul qilingan.
Yuqori martabali amaldorning qayd etishicha, so‘nggi bir oy ichida Rossiyadagi neftni qayta ishlash zavodlari benzin ishlab chiqarishni 5 foizga, dizel yoqilg‘isi ishlab chiqarishni esa 14 foizga oshirgan.
Cheklovlar Yevroosiyo iqtisodiy ittifoqi mamlakatlariga benzin yetkazib berish bo‘yicha avval erishilgan kelishuvlarga taalluqli emas.
