Rojdestvo arafasida teraktlar uyushtirishda gumon qilingan dog‘istonlik erkak Venada o‘z joniga qasd qildi. U Rossiyaga jo‘natilishidan bir necha soat oldin o‘zini osgan

Terrorizmda gumon qilingan 40 yoshli Dog‘istonlik fuqaro Rossiyaga deportasiya qilinishidan bir necha soat oldin Venadagi polisiya markazida o‘z joniga qasd qildi. Bu haqda Bild xabar bermoqda.

Nashrning yozishicha, erkak oshxona sochiq va tufli bog‘ichidan foydalanib o‘zini osgan. Ushbu qarorning sabablari haqida hech narsa ma’lum emas: yigit 11 iyul kuni ertalab soat oltida uyiga yuborilishi kerak edi.

Bild nashrining yozishicha, dog‘istonlik fuqaro Kyoln sobori, shuningdek, Venadagi Avliyo Stefan soborida terakt uyushtirishni rejalashtirganlikda gumon qilingan. Tergov ma’lumotlariga ko‘ra, uning sheriklari er-xotin va asli tojikistonlik nemis bo‘lgan. Hujumlar Rojdestvo va Yangi yil arafasida amalga oshirilishi rejalashtirilgan edi, biroq hujumchilar bir necha kun oldin Avstriya va Germaniyada qo‘lga olingan.

Ma’lumki, rossiyalik Afg‘onistondagi "Tolibon" bilan raqobatlashuvchi "Islomiy davlat" bo‘limi bo‘lgan "Xuroson viloyati" a’zosi bo‘lgan. Aynan shu guruh joriy yilning mart oyida "Krokus Siti Xoll"da sodir etilgan terakt uchun javobgarlikni o‘z zimmasiga olgan edi.

23 dekabr kuni Bild nashri Avstriya, Germaniya va Ispaniya xavfsizlik organlariga yangi yil va Rojdestvo bayramlarida islomiy terrorchilar guruhi bir nechta teraktlar tayyorlayotgani haqida ma’lumot olgani haqida xabar berdi. Bunga Kyoln, Vena va Madriddagi Rojdestvo marosimlari paytida cherkovlarga hujum qilish xavfi haqidagi xabarlar kiradi. Biroq, 2 yanvar kuni Germaniya polisiyasi Kyoln soborida terakt tayyorlashda gumon qilinib, qo‘lga olingan besh nafardan uchtasini qo‘yib yuborgani ma’lum bo‘ldi. Beshinchi mahbus kim ekanligi noma’lum.