“Real” Vinisius Junior bilan yangi shartnoma imzolamoqchi

Madridning “Real” klubi Vinisius Junior bilan shartnomani uzaytirish ustida ishlamoqda.

Relevo nashri xabariga ko‘ra, Madrid klubi braziliyalik futbolchining yangi shartnomasi masalasini mavsum yakuniga qadar hal qilmoqchi va yaqin orada "Real" va Vinisius o‘rtasida o‘tgan yozda boshlangan muzokaralar qayta tiklanadi.

"Real Madrid" Vinisiusga 5 mavsum uchun 1 milliard yevro to‘lashga tayyor bo‘lgan Saudiya Arabistonidan kelgan taklif shartnomani uzaytirishga to‘sqinlik qilishi mumkin deb hisoblamoqda. "Qaymoqranglilar" saudiyaliklarning 24 yoshli vingerga bo‘lgan qiziqishini inobatga olishmoqda va futbolchining sport ambisiyalari va 1 milliard yevro sotib olish bandi unga shartnomani uzaytirishda yordam berishiga umid qilmoqda.

Ta’kidlanishicha, Vinisius avgust oyida "Real"ni tark etishni o‘ylagan, ammo yakunda jamoada qolishga qaror qilgan. Shunga qaramay, Saudiya Arabistoni hali ham braziliyalik futbolchiga bo‘lgan qiziqishni yo‘qotgani yo‘q va ertami-kechmi uni o‘z chempionatiga jalb qilish imkoniyatlariga optimistik qaramoqda.

Vinisiusning "Real" bilan amaldagi shartnomasi 2027 yilda yakuniga yetadi.