Qozog‘iston hukumati xorijiy mijozlarga banklarda xizmat ko‘rsatish bo‘yicha yangi cheklovlar joriy etishni rejalashtirmoqda

Bundan buyon yashash uchun ruxsatnomasi bo‘lmagan barcha norezidentlar o‘z hisoblariga kirish huquqini saqlab qolish uchun har oy identifikasiyadan o‘tishlari kerak bo‘ladi.

Bu o‘zgarishlar moliyaviy firibgarlik, jinoiy daromadlarni legallashtirish va noqonuniy operasiyalarga qarshi kurashishga qaratilgan, deya tushuntirdi Moliya bozorini tartibga solish va rivojlantirish agentligi.

Agentlik mamlakat banklarini xorijliklarning Qozog‘istonda bo‘lishi qonuniyligini tekshirish, ularning soliq identifikasiya raqamlarini tasdiqlash va pasport ma’lumotlarini tekshirish majburiyatini yuklaydigan qonun loyihasini tayyorladi.

Bundan tashqari, hisobvaraq ochishda norezidentlar mablag‘lardan maqsadli foydalanish va moliyalashtirish manbasini ko‘rsatuvchi so‘rovnomani to‘ldiradilar.

Kartochka chiqarilgandan keyingi dastlabki uch oy mobaynida banklar mijozlarning tranzaksiyalari ustidan nazoratni kuchaytiradi, tranzaksiyalarning e’lon qilingan moliyaviy faoliyatga mos kelishini tekshiradi. Agar to‘lovlar kommunal, soliq yoki boshqa rasmiy xarajatlar bilan tasdiqlanmasa, bank hisobni yopishi mumkin.

Bundan tashqari, masofadan hisobvaraqlar ochish va vakillar orqali kartalar berish taqiqlanadi. Endi kartani masofadan turib ochish mumkin bo‘lmaydi, masalan, Rossiyada.

Tranzaksiyalarni amalga oshirish yoki aloqa ma’lumotlarini o‘zgartirishdan oldin chet elliklar ikki faktorli biometrik autentifikasiyadan o‘tishlari kerak.

Kartalar soni ham cheklangan bo‘ladi: bir kishi faqat bitta to‘lov kartasiga ega bo‘ladi, ijtimoiy va bolalar hisoblari, shuningdek, kreditni to‘lash uchun mo‘ljallangan kredit kartalari bundan mustasno. Norezident kartalarning amal qilish muddati 12 oy bilan cheklangan.

Bundan tashqari, moliyaviy regulyatorlar 500 ming tengedan (taxminan 992 dollar) oshgan xalqaro pul o‘tkazmalari ustidan nazoratni kuchaytirish niyatida. Rasmiy daromadga ega bo‘lmagan, lekin uchinchi shaxslardan katta miqdorda pul oladigan 14 yoshdan 25 yoshgacha bo‘lgan fuqarolarga ham e’tibor kuchaytiriladi.

Qozog‘iston avvalroq norezidentlar uchun kartalarning amal qilish muddatini bir yilgacha qisqartirgan edi. Mutaxassislarning ogohlantirishicha, yangi cheklovlar banklarning operasion xarajatlarini oshirishi va ularning xorijiy mijozlarga xizmat ko‘rsatishga qiziqishini kamaytirishi mumkin.