Qoraqalpog‘iston ilmiy-amaliy tibbiyot akademiyasi tashkil etiladi

“Qoraqalpog‘iston ilmiy-amaliy tibbiyot akademiyasini tashkil etishga oid chora-tadbirlar to‘g‘risida”gi Prezident qarori qabul qilindi.

Qarorga ko‘ra, quyidagilar tashkil etiladi:

— yuridik shaxs maqomiga ega bo‘lgan Qoraqalpog‘iston ilmiy-amaliy tibbiyot akademiyasi;

— Akademiya tarkibida ilmiy-tadqiqot laboratoriyasi, o‘quv-simulyasion markaz va mehmonxona.

Nukus shahrida joylashgan davlat va nodavlat davolash-profilaktika muassasalari Akademiyaning klinik bazasi hisoblanadi.

Quyidagilar Akademiya faoliyatining asosiy yo‘nalishlari etib belgilandi, jumladan:

— tibbiyot kadrlarini qayta tayyorlash va malakasini oshirish;

— tashxislash va davolashning yuqori texnologiyali innovasion usullarini amaliyotga joriy etish;

— telemedisina texnologiyalaridan keng foydalanish uchun sharoitlar yaratish.

2025/2026 o‘quv yilidan Akademiyada klinik ordinaturada yuqori malakali tibbiyot kadrlarini tayyorlash yo‘lga qo‘yiladi.

2025 yil 1 oktyabrdan Akademiya faoliyati to‘liq yo‘lga qo‘yiladi.