Qirg‘iziston Falastinga elchi tayinlash imkoniyatini ko‘rib chiqmoqda

Bu haqda Vazirlar Mahkamasi raisi o‘rinbosari Edil Baysalov TRT World telekanaliga bergan intervyusida aytib o‘tdi.

Undan Baysalovning so‘nggi paytlarda G‘azodagi vaziyatga xalqaro aralashuvga chaqiruvlarini inobatga olib, Qirg‘iziston dunyo sahnasida gumanitar tashviqotga qanday qarashi so‘ralgan.

«Biz yordam jo‘natamiz va Falastinga elchi tayinlash masalasini ko‘rib chiqyapmiz. Hozirgi diplomatik sa’y-harakatlar juda sekin bo‘lib tuyulishi mumkin, ammo biz orqaga qaytmayapmiz. Hozirgi diplomatiya cheklangandek ko‘rinsada, biz BMTda xalqaro harakatlarni talab qilishda davom etamiz. Davom etayotgan vahshiyliklar, ayniqsa, biz ularni jonli tomosha qilganimizda, chuqur umidsizlik va fojiali. Biz bunday jangovar harakatlar va tinch aholiga qarshi hujumlar o‘tmishga aylanadi, deb umid qilgandik, ammo afsuski, bunday emas», — deb javob berdi u.