Putin Trampga qanday ta’sir o‘tkazishni biladi

AQSh prezidentining milliy xavfsizlik bo‘yicha sobiq maslahatchisi Jon Bolton CNN telekanaliga bergan intervyusida Rossiya prezidenti Vladimir Putin Amerika yetakchisi Donald Trampga qanday ta’sir o‘tkazishni bilishini aytdi. Bu haqda “Newsweek” yozmoqda.

“Putin Trampga ta’sir o‘tkazishga harakat qiladi, deb o‘ylayman. Menimcha, u buni qanday qilishni biladi. U Tramp bilan qanday muomala qilishni biladi. Va menimcha, bu Ukraina uchun juda xavfli vaziyat”, - deya Boltonning intervyudagi so‘zlarini keltiradi jurnalistlar.

Putin Tramp bilan har ikki davlatni qiziqtirgan barcha sohalarda xotirjamlik bilan gaplashishga tayyorligini ma’lum qildi. Tramp avvalroq Putin bilan “darhol” uchrashmoqchi ekanligini va Rossiya rahbari ham buni xohlayotgani haqida “signallar” olayotganini aytgan edi.

Oq uyning yangi xo‘jayini Ukrainadagi mojaroni zudlik bilan to‘xtatishga chaqirib, jangovar harakatlar cho‘zilishining ehtimoliy salbiy oqibatlari haqida ogohlantirgandi.

Rossiya prezidenti matbuot kotibi Dmitriy Peskov Rossiya bu tahdidlarda yangilik ko‘rmaganini aytdi. Uning eslatishicha, Tramp sanksiya usullarini birinchi prezidentlik davrida ham yoqtirgan, biroq undan teng huquqli muloqot uchun hozircha hech qanday signallar bo‘lmagan, Moskva esa bunga tayyor.