Putin Rossiyada elektron sigaret sotishni taqiqlash g‘oyasini to‘liq qo‘llab-quvvatladi

Rossiya prezidenti Vladimir Putin mamlakatda veyp (elektron sigaret) mahsulotlarini sotishni butunlay taqiqlash taklifini qo‘llab-quvvatladi.

Putin bu haqda Samaradagi adaptiv sport namoyishi va ta’lim markaziga tashrifi chog‘ida ma’lum qildi.

Tashabbusni "Sog‘lom Vatan" Butunrossiya jamoat harakati rahbari Yekaterina Leshchinskaya taklif qildi va u shunga o‘xshash chora-tadbirlar bir qator MDH va boshqa mamlakatlarda ham muvaffaqiyatli amalga oshirilganini ta’kidladi.

"Rossiyada veypingni to‘liq taqiqlash to‘g‘risida buyruq berish" so‘roviga javoban Putin ma’qullab bosh irg‘ab, bu g‘oyani qo‘llab-quvvatlashini ko‘rsatdi.

Prezident "nafaqat bunday qaror qabul qilish, balki yoshlar bilan to‘g‘ri ish olib borish ham muhim" ekanini ta’kidladi.