Pokistondagi Tolibon harakati sud binosi oldida sodir etilgan portlash uchun javobgarlikni o‘z zimmasiga oldi

Pokistondagi Tolibon harakati vakillari Pokiston poytaxti Islomoboddagi sud binosi oldida sodir etilgan va kamida 12 kishining hayotiga zomin bo‘lgan xudkush portlash uchun javobgarlikni o‘z zimmasiga oldi.

Bu haqda AFP xabar bermoqda.

"Nishonda islomga to‘g‘ri kelmaydigan qonunlarga muvofiq qaror chiqargan sudyalar, advokatlar va amaldorlar bo‘ldi", - deydi harakat vakillari.

Ular, shuningdek, Pokistonda Islom qonunlari joriy etilgunga qadar hujumlarni davom ettirishlarini bildirishdi.

Pokiston Mudofaa vaziri Xavaja Osif, o‘z navbatida, mamlakat bu zo‘ravonlik harakati uchun Kobul oldida javob berishini aytdi.

Bugun tushdan keyin Islomoboddagi sud binosi oldida xudkush tomonidan sodir etilgan portlashda kamida 12 kishi halok bo‘ldi, 27 kishi yaralandi.

Bir necha soat avval qurolli guruh Pokistonning Afg‘oniston bilan chegaradosh Janubiy Vazariston tumanidagi Vana shahridagi harbiy internatga bostirib kirdi. Kirish uchun yana bir xudkush bomba yuklangan mashinani kiraverishda portlatib yubordi. Binoda yashiringan jangarilarga qarshi operasiya davomida uch kishi halok bo‘lgan.

Pokiston ichki ishlar vaziri Mohsin Naqviga ko‘ra, Vanada terrorchi-xudkush Afg‘oniston fuqarosi ekani aniqlangan. “Biz Afg‘onistonning hujumda bevosita ishtirok etishiga aminmiz”, — deya uning so‘zlaridan iqtibos keltirgan DPA axborot agentligi.

Har ikki hujumni qoralagan Pokiston Bosh vaziri Shahboz Sharif, ularning Afg‘oniston hududidan Hindiston ko‘magida amalga oshirilganini aytdi. Dehli bayonotga javob bermadi.