Pentagon Yevropada AQShning 40 minggacha harbiy xizmatchisini chiqarishni ko‘rib chiqmoqda — NBC

Pentagon Yevropadagi Amerika harbiy kontingentini kamida 25 ming kishiga qisqartirishni ko‘rib chiqmoqda. Variantlardan biri hozirgi harbiylar sonining yarmiga teng bo‘lgan 40 minggacha harbiy xizmatchini Yevropadan olib chiqishni nazarda tutadi.

Bu haqda NBC News amaldagi va sobiq amerikalik hamda g‘arblik amaldorlarga tayanib xabar bermoqda. Hozircha yakuniy qaror qabul qilinmagan.

Qisqartirish eng ko‘p Germaniya, Italiya va Ispaniyaga ta’sir qilishi mumkin. Hozir Germaniyada qariyb 36 ming nafar amerikalik harbiy xizmatchi joylashgan.

To‘rtta ssenariy ko‘rib chiqilmoqda. Ular quruqlikdagi, havo va dengiz kuchlarini qisqartirishni o‘z ichiga oladi. Ayrim bo‘linmalar Yevropadan butunlay olib chiqilmasdan, NATOning sharqiy qanotiga yaqinroq hududlarga ko‘chirilishi mumkin.

Mudofaa vaziri Pit Xegsetga yakuniy tavsiyani 6 noyabrga qadar taqdim etish kutilmoqda. Shundan so‘ng takliflar Donald Trampga taqdim etilishi mumkin.

Ayni vaqtda Vashington Polshada doimiy harbiy huzurni kuchaytirish masalasini ham muhokama qilmoqda. Tramp 17 sentyabr kuni u yerda AQSh armiyasining yangi bazasini tashkil etish bo‘yicha muzokaralarda **«sezilarli taraqqiyot»**ga erishilganini aytdi.