Oq uy: "AQSh Ukrainadagi vaziyatni tinch yo‘l bilan hal qilishdan umidvor"

Tramp ma’muriyati Rossiya-Ukraina urushini tugatish bo‘yicha tinchlik kelishuvi istiqbollariga juda optimistik.

Bu haqda Oq uy matbuot kotibi Kerolin Levitt jurnalistlarning maxsus elchi Stiv Uitkoffning Moskvaga kutilayotgan tashrifi haqidagi savollariga javob berish chog‘ida aytib o‘tdi.

"Ma’muriyat juda optimistik. Prezidentning butun apparati, jumladan Uitkoff, Davlat kotibi Marko Rubio, vise-prezident (Jey Di Vens), prezidentning o‘zi va (Pentagon kotibi Pit) Xegset bu borada juda qattiq mehnat qilishdi", dedi u.

Levitt 30 noyabr kuni Floridada bo‘lib o‘tgan AQSH-Ukraina muzokaralari juda yaxshi o‘tganini ta’kidlab, hozirgi faoliyatni Vashingtonning har ikki tomon bilan teng ravishda gaplashadigan "shatl diplomatiyasi" deb ta’rifladi.

Matbuot kotibi mumkin bo‘lgan kelishuvning asosiy nuqtalari allaqachon qog‘ozga tushirilganini va sezilarli darajada takomillashtirilganini tasdiqladi. Uning qo‘shimcha qilishicha, tafsilotlar muzokaralar mavzusi bo‘lib qolsa-da, Oq uy ijobiy fikrda va urush tugatilishiga umid qilmoqda.