Microsoft sun’iy intellektga sarmoya kiritib, 9 ming xodimni qisqartirishga qaror qildi

Microsoft kompaniyasi 2025 yilda sun’iy intellektga katta sarmoya kiritishi fonida 9 minggacha xodimni qisqartirishini ma’lum qildi. Bu mazkur yildagi navbatdagi qisqartirish to‘lqini bo‘ldi.

Kompaniyaning bayonotiga ko‘ra, bir necha bo‘limlar bu qarordan ta’sir ko‘radi, lekin aniq qaysi bo‘limlar ekani ochiqlanmadi. Shunga qaramay, ommaviy axborot vositalari Xbox video o‘yinlar bo‘limi ham qisqartirishga duch kelishi mumkinligini ta’kidlamoqda.

Microsoft sun’iy intellekt sohasiga katta ye’tibor qaratmoqda va bu yo‘nalishda 80 mlrd dollar sarflab, yangi ma’lumot markazlari qurmoqda. Kompaniya matbuot kotibining ma’lum qilishicha, bu o‘zgarishlar bozordagi raqobatda muvaffaqiyatli bo‘lish uchun zarur.

Mazkur qisqartirish kompaniyaning jahon bo‘yicha 228 ming xodimining taxminan 4 foizini tashkil etadi. Microsoft 2025 yilda bu bilan birga to‘rtinchi marta qisqartirish olib bormoqda. May oyida ham 6 ming ish o‘rni qisqartirilgan edi.

Vashington shtati rasmiy bazasiga ko‘ra, qisqartiriladigan ish o‘rinlarining katta qismi Redmond va Belvyu shaharlarida joylashgan bo‘ladi.

Oxirgi yillarda Microsoft kompaniyasi sun’iy intellekt va ma’lumot markazlari hamda chiplar ishlab chiqishga katta mablag‘ yo‘naltirmoqda. O‘tgan yili britan sun’iy intellekt mutaxassisi Mustafa Sulaymon Microsoft AI bo‘limining rahbari etib tayinlangan edi.

Microsoft sun’iy intellekt kelgusi 50 yilni tubdan o‘zgartirishiga ishonmoqda. Kompaniyaning OpenAI bilan hamkorligida ba’zi muammolar kuzatilgan, chunki biznes mijozlari Copilot yordamchisidan ko‘ra ChatGPT’ni afzal ko‘rmoqda.

AQShdagi boshqa yirik texnologik kompaniyalar ham sun’iy intellekt sohasida yetakchi mutaxassislarni jalb qilish uchun kuchli raqobat olib bormoqda. Meta kompaniyasi raqobatchilardan mutaxassislarni jalb etishga alohida e’tibor qaratmoqda, OpenAI esa ba’zi mutaxassislarga 100 mln dollarlik bonus taklif qilinayotganini ma’lum qildi.