Meksikaning Chilpansingo shahri (Gerrero shtatining ma’muriy markazi) meri Alexandro Arkos o‘z lavozimiga kirishganidan olti kun o‘tib o‘ldirildi. Uch kun oldin shahar hukumatining yangi kotibi Fransisko Tapiya otib o‘ldirilgan edi. Reuters agentligining qayd etishicha, Meksika shtatida 2 iyun kuni bo‘lib o‘tadigan saylovlar arafasida davlat lavozimlariga olti nafar nomzod o‘ldirilgan.
Chilpansingo shahri Meksikaning janubi-g‘arbiy qismida joylashgan bo‘lib, 280 mingga yaqin aholiga ega. Reuters xabarida aytilishicha, Gerrero hukumat amaldorlari va jurnalistlar uchun eng xavfli shtatlardan biri.
Alexandro Arkosning o‘ldirilishi bo‘yicha jinoiy ish ochilgan. Uning o‘limi messenjerlar va ijtimoiy tarmoqlarda pikap tomida kesilgan bosh va old yo‘lovchi o‘rindig‘ida o‘tirgan jasad tasvirlangan suratlar e’lon qilingandan keyingina rasman tasdiqlandi. Foydalanuvchilarning ta’kidlashicha, fotosuratlarda Alexandro Arkosning jasadi aks etgan. Suratlarning haqiqiyligi rasman tasdiqlanmagan.
Alexandro Arkosning ijtimoiy tarmoqlaridan ma’lum bo‘lishicha, u so‘nggi kunlarda "Jon" to‘foni ortidan tabiiy ofatlarga yordam berish ishlarini nazorat qilib kelgan.
