Makron: "Hududiy masalalarni faqat Ukraina muhokama qilishi mumkin, AQSh emas"

Fransiya prezidenti Emmanuel Makron o‘z mamlakatining hududiy masalalarini faqat Ukraina muhokama qilish huquqiga ega ekanligini aytdi.

Bu haqda u Parijda Ukraina prezidenti Vladimir Zelenskiy bilan o‘tkazgan qo‘shma matbuot anjumanida ma’lum qildi.

Uning ta’kidlashicha, Qo‘shma Shtatlar vositachi rolini o‘z zimmasiga olgan va u prezident Donald Tramp boshchiligidagi Amerika jamoasining ishini yuqori baholaydi: "Tinchlik masalasida hammaning o‘rni bor, biroq Ukraina hududiy muammoni muhokama qila oladigan yagona mamlakatdir".

Makron, shuningdek, hali yakuniy tinchlik rejasi yo‘qligiga aniqlik kiritdi: "Bugungi kunga kelib, hududiy muammoni o‘z ichiga olgan yakuniy reja yo‘q. Uni faqat prezident Zelenskiy tasdiqlashi mumkin. Amerika vositachilari tez orada Moskvaga jo‘nab ketishadi".

Uning qo‘shimcha qilishicha, yaqinda birinchi marta Rossiyaga neft-gaz sektori orqali bosim o‘tkazishning chinakam yaxlit yondashuvi qo‘llanilmoqda: “Biz bilamizki, Rossiya harbiy harakatlarining 40 foizi “soya floti” orqali moliyalashtiriladi. Birinchidan, bu taraqqiyot AQShning yaqinda qabul qilgan sanksiya qarori, ikkinchidan, “soya floti”ga bosimning kuchayishi bilan bog‘liq. Shu bois, ishonchim komilki, yaqin haftalarda Rossiya iqtisodiyotiga bosim va uning harbiy harakatlarni moliyalash qobiliyati sezilarli darajada o‘zgaradi”.