Makkada suv toshqinlari ro‘y berdi

Makkada kuchli yomg‘ir sel va suv toshqinlariga sabab bo‘ldi.

7 yanvar kuni Makka shahrida yog‘gan kuchli yomg‘ir va sel suv toshqinlarini keltirib chiqardi. Saudiya Arabistonining SPA rasmiy axborot agentligi xabar berishicha, yomg‘ir shaharning ko‘plab tumanlarini qamrab olgan.

Mahalliy va ijtimoiy medialarda tarqalgan surat va videolarda shahardagi ko‘chalar, xiyobonlar, va yo‘llar sel suvi bilan to‘lib ketgani aks etdi. Ba’zi joylarda avtomobil va motosikllar suv oqimida sudralib ketgan. Makkadagi ish joylari va do‘konlar suv bosgani sababli iqtisodiy zarar yetkazilgan.

Saudiya Arabistoni Milliy meteorologiya markazi kuchli yomg‘ir, shamol, va do‘l yog‘ishi ehtimoli haqida oldindan ogohlantirgan edi. Biroq sel suvlarining tezkor oqimi shahar infratuzilmasiga jiddiy ta’sir ko‘rsatdi.

Hozircha sel natijasida insonlar orasida qurbonlar yoki jabrlanganlar haqida rasmiy ma’lumot berilmadi. Viloyat hokimiyati va favqulodda vaziyatlar xizmati fuqarolarni ehtiyot choralarini ko‘rishga chaqirdi hamda hozirda sel suvlarini tozalash ishlari olib borilayotganini ma’lum qildi.