London Brexitdan keyin birinchi marta Buyuk Britaniya va Yevropa Ittifoqi sammitiga mezbonlik qiladi

Buyuk Britaniya va Yevropa Ittifoqining birinchi sammiti dushanba kuni Londondagi Lankaster-xausda bo‘lib o‘tadi. Britaniya rasmiylariga ko‘ra, sammit tomonlarning mudofaa va savdo sohalaridagi hamkorligini mustahkamlash hamda Brexitdan keyin London va Bryussel o‘rtasidagi munosabatlar tarixida yangi sahifa ochishdan iborat.

Tadbirda Yevropa Ittifoqidan Yevropa Kengashi prezidenti Antonio Kosta, Yevropa komissiyasi prezidenti Ursula fon der Lyayen, Yevropa Ittifoqi diplomatik xizmati rahbari Kaya Kallas va savdo siyosati va iqtisodiy xavfsizlik bo‘yicha Yevropa komissari Marosh Shefchovich ishtirok etadi. Sammit yakunlari bo‘yicha Buyuk Britaniya va YEI o‘rtasida harbiy sohadagi hamkorlikni mustahkamlash bo‘yicha kelishuvga erishilishi kutilmoqda.

Financial Times gazetasining yozishicha, yangi mudofaa pakti Britaniya kompaniyalari uchun birgalikda qurol sotib olishda ishtirok etish imkoniyatlarini ochib beradi hamda ikki tomon mudofaa idoralari o‘rtasidagi hamkorlik darajasini oshiradi. Reuters ta’kidlaganidek, bunga javoban Yevropa davlatlari Londondan Britaniya suvlarida baliq ovlash kvotalarini oshirishni talab qildi.

The Guardian gazetasining xabar berishicha, Buyuk Britaniya va YEI sammitdan keyin “geosiyosiy birdamlik” bayonotini chop etishni rejalashtirmoqda. Nashrning yozishicha, hujjat mualliflari AQSh prezidenti Donald Tramp ma’muriyatiga Yevropa davlatlarining jahon siyosatining eng dolzarb masalalari bo‘yicha pozisiyalari birligini ko‘rsatish niyatida.

The Times gazetasining yozishicha, Britaniyaning Yevropa Ittifoqi bilan tuzgan barcha kelishuvlarini uch guruhga bo‘lish mumkin. Birinchisida, fundamental kelishuvlarga erishilgan va tafsilotlar keyinroq yakunlanadi. Bunga mudofaa va xavfsizlik sohasida hamkorlik to‘g‘risidagi pakt, shuningdek, Britaniya va Yevropa emissiyasi kvotalari savdosi tizimlarini birlashtirish va britaniyaliklarga Yevropa Ittifoqi mamlakatlarida avtomatlashtirilgan chegara nazorat punktlaridan foydalanishga ruxsat berish kiradi.