Kazakh Scout: O‘zbekiston U17 terma jamoasining kamida yarmi Yevropa va Osiyo jamoalariga o‘tishi kerak

Tvitter ijtimoiy tarmog‘ida "Kazakh Scout" profilini yurituvchi shaxs O‘zbekiston o‘smirlar terma jamoasi futbolchilari haqida iliq fikrlar bildirdi.

"Evropa va Osiyoning yetakchi klublari O‘zbekiston U-17 jamoasining hech bo‘lmaganda yarmini o‘z tarkiblariga qo‘shib olmasalar, bundan juda ham hayron bo‘laman. Shukurullayev, Rustamov, Hasanov, Aliyev va boshqalar – barchasi iqtidorli yigitlar.

Men ularga omad tilayman, lekin Saudiya Arabistoniga qarshi final oldidan ularga omad kerak bo‘lmaydi, deb o‘ylayman", — deya yozdi muallif.

Ushbu fikrga javoban @Nottscountycol sahifasi egasi quyidagicha fikr bildirdi:

"Katta ehtimol bilan Rossiya, Qozog‘iston, Belarus va Ozarboyjon klublari ularni o‘z safiga qo‘shib olsa kerak. Boisi, ularning madaniyati O‘zbekistonniki bilan o‘xshash".

"Kazakh Scout" esa bu fikrga qo‘shilmadi: "Ular Rossiya, Belarus chempionati darajasidan o‘sib ketishgan. Ular Belgiya, Niderlandiya, Turkiya, Xorvatiya, Serbiya va Fransiya klublarida asosiy tarkib uchun kurasha olishadi. Ayniqsa, Husanov o‘zbeklar nimalar qodirligini ko‘rsatganidan keyin".