Karim Benzema yana "Real" qarorgohida

Fransiyalik hujumchi Karim Benzema "Real" qarorgohiga tashrif buyurdi.

Xabaringiz bor, Ispani Superkubogi uchun bahslar Saudiya Arabistonida bo‘lib o‘tmoqda. Bugun tunda ikkinchi yarim finalda "Real Madrid" "Malyorka" bilan kuch sinashadi. Bahs Jiddadagi "Qirol Abdulla" stadionida bo‘lib o‘tadi.

"Real"ning sobiq hujumchisi Karim Benzema hozirda aynan shu mamlakatda "Al Ittihod" sharafini himoya qilmoqda. Karim fursatdan foydalanib, ispan klubi delegasiyasi joylashgan mehmonxonaga tashrif buyurgan va sobiq jamoadoshlari bilan uchrashgan.

Eslatib o‘tamiz, Saudiya Arabistoni chempionati joriy mavsumi 13-turidan keyin "Al Ittihod" 36 ochko bilan yetakchi bo‘lib turibdi. Karim Benzema esa 10 ta o‘yinda 10 ta gol urib, 3 ta golli uzatma yetkazib berdi.