Kanalizasiya qudug‘idan chiqa olmagan ikki xodim qutqarildi

Qashqadaryoda kanalizasiya qudug‘ini tozalamoqchi bo‘lgan ikki xodim qutqarildi.

15 yanvar kuni Qashqadaryo viloyati, Shahrisabz shahar “Tutzor” MFY hududidagi yo‘l yoqasida joylashgan kanalizasiya qudug‘iga “Suv oqova” MCHJning 2 nafar xodimi tozalash maqsadida tushganligi va qaytib chiqa olmaganligi to‘g‘risida FVBga xabar tushgan.

Ma’lum bo‘lishicha, chuqurligi 3 metr, diametr 1 metr bo‘lgan quduqning suv o‘tish yo‘liga tiqilib qolgan chiqindilarni tozalash maqsadida, 1 nafar ishchi tushgan va suv ko‘payib ketib, suv yutishi natijasida tobi qochgan hamda chiqa olmay qolgan.

Shundan so‘ng, uning sherigi yordam berish maqsadida tushib, u ham qolib ketgan.

Zudlik bilan aytilgan manzilga yetib borgan FVB qutqaruvchilari maxsus qutqaruv asbob-anjomlari yordamida fuqarolarni qutqarib, malakali tibbiy yordam ko‘rsatish ko‘rsatish maqsadida shifoxonaga yuborilgan. Hozirda shifokorlar nazoratida.

Hodisa oqibatida halok bo‘lganlar mavjud emas.