Javohir Sindarov Freestyle Chess Grand Slam turniri finalida o‘ynadi

Grossmeyterimiz Javohir Sindarov nufuzli Freestyle Chess Grand Slam turnirining saralash bahslarida ishtirok etdi.

Hamyurtimiz 20 nafar shaxmatchi qatnashgan saralash bahslarida 7,5 ochko bilan pley-off bosqichiga yo‘l olgandi. U 6 g‘alaba va 3 durang bilan qo‘shimcha ko‘rsatkichlarga ko‘ra 3-o‘rinni egallagandi. Javohir Sindarov pley-off bosqichini ham muvaffaqiyatli boshlagandi. U 1/8 finalda xitoylik Vey Yini 1,5:0,5, 1/4 finalda hindistonlik grossmeyster Rameshbabu Praggnanandhani 2:0 hisobida taslim etgandi.

Kecha tunda yarim final va hal qiluvchi final uchrashuvlari o‘tkazildi. Javohir xitoylik shaxmatchi - Yu Yang Yiga qarshi kechgan 1/2 final bahsida 1,5:0,5 hisobida zafar quchdi. Finalda esa sloveniyalik Vladimir Fedoseev bilan to‘qnash keldi. Fedoseev ilk saralash bosqichida 8 ochko bilan 1-o‘rinni egallab, pley-offga yo‘l olgandi. Yarim finalda yaqinda Magnus Karlsen bilan blis bo‘yicha jahon chempionatida qo‘sh g‘oliblikni qo‘lga kiritgan Yan Nepomnyashiyni yutdi.

Sindarov finalning birinchi partiyasida Fedoseevdan ustun keldi. Ammo ikkinchi partiyada Vladimir muvozanatni tikladi. Keyingi ikki partiyada kuchli teng keldi. Afsuski, g‘olib nomini aniqlab bergan armagedon partiyasida omad Fedoseevga kulib boqdi va aynan u g‘olib sifatida fevral oyida bo‘lib o‘tadigan asosiy turnirga yo‘llanma oldi.

Ma’lumot uchun, asosiy turnirda Nodirbek Abdusattorov ham ishtirok etadi. Hamyurtimiz to‘g‘ridan-to‘g‘ri yil davomida dunyoning bir nechta shahrida o‘tkaziladigan Freestyle Chess Grand Slam 2025 turniri ishtirokchisiga aylangan.