Janubiy Koreya KXDR bilan aloqalari uchun Rossiyaga qarshi yangi sanksiyalar joriy qildi

Janubiy Koreya shimoliy koreyalik mutaxassislarni Rossiya Federasiyasiga ishlashga jalb qilish orqali “KXDRning yadroviy va raketa dasturlarini moliyalashtirishga” hissa qo‘shgan rossiyalik ikki nafar jismoniy va ikki yuridik shaxsga nisbatan sanksiyalar joriy etishga qaror qildi. Bu haqda bugun, 2 aprel kuni mamlakat Tashqi ishlar vazirligi ma’lum qildi.

"Intellekt" va "SodeystviYE" kompaniyalari, shuningdek, ularning rahbarlari Sergey Kozlov va Fyodor Panfilov qora ro‘yxatga kiritilgan. Aytilishicha, "Intellekt" kompaniyasi Shimoliy Koreya mutaxassislariga, jumladan IT xodimlariga Rossiyada ishlash uchun hujjatlarni tayyorlashda yordam bergan. O‘z navbatida, "SodeystviYE" kompaniyasi Shimoliy Koreya ishchilarining Rossiya Federasiyasiga kirishi va mamlakatda qonuniy bo‘lish huquqini ro‘yxatdan o‘tkazishda yordam bergan.

Bundan tashqari, Rossiyaning ikki kemasi – Angara va Lady R’ga nisbatan sanksiyalar joriy etildi. Vazirlik ular BMT Xavfsizlik Kengashi rezolyusiyalarini buzgan holda “Rossiya va Shimoliy Koreya o‘rtasida harbiy yuk tashish”da ishtirok etganini da’vo qilmoqda.

Eslatib o‘tamiz, o‘tgan hafta Qo‘shma Shtatlar va Janubiy Koreya Shimoliy Koreyaning ommaviy qirg‘in qurollari dasturini qo‘llab-quvvatlaganliklari uchun Rossiya, Xitoy va Birlashgan Arab Amirliklarining olti nafar jismoniy va ikki yuridik shaxsiga nisbatan sanksiyalar joriy qilgandi.

Boshqa xalqaro firmalar qatorida Vladivostokda joylashgan va Shimoliy Koreyaning Chinyong kompaniyasi bilan aloqador bo‘lgan Rossiyaning “Alis” kompaniyasiga ham sanksiya qo‘yilgan.