Isroil yadroviy qurol masalasini diplomatik yo‘l bilan hal qilishga tayyor

Isroil Eronning yadroviy qurolga ega bo‘lishining oldini olishni istaydi, biroq bu masalani diplomatiya yo‘li bilan hal qilishga tayyor.

Bu haqda Isroil tashqi ishlar vaziri Gideon Saar Telegraph gazetasiga bergan intervyusida ma’lum qilgan.

Vazir Fransiyaning Falastin davlatini tan olishi masalasiga to‘xtalib, Eronning yadroviy qurolga ega bo‘lishi xavfi haqida ham gapirdi. U, shuningdek, Isroil may oyidayoq Eronga hujum qilishni rejalashtirgani haqidagi xabarlarni rad etdi.

"Men xavfsizlik kabineti va barcha yopiq forumlarning a’zosiman va bunday qaror esimda yo‘q. Bunday qaror qabul qilingan deb o‘ylamayman. Lekin Isroil Eron yadro quroliga ega bo‘lishining oldini olish maqsadiga sodiq. Agar bu maqsadga diplomatik yo‘l bilan erishish mumkin bo‘lsa, bu qabul qilinadi", - dedi Saar.

Siyosatchi, shuningdek, Isroil hukumati Erondagi yadro quroli bo‘yicha AQSh va Yevropa bilan aloqada ekanini ta’kidladi.

"Eron o‘z xalqaro majburiyatlariga doim beparvo munosabatda bo‘lib kelgan. Men ular zaruriy yechimga erishmaslik uchun qandaydir qisman kelishuvlarga erishishga harakat qilishlarini istisno qilmayman... Eron zaif holatda va bundan maqsadga erishish uchun foydalanish kerak", - deya qo‘shimcha qildi Saar.