Inson tanasida suv yetishmovchiligi: suvsizlikning 6 asosiy belgisi

Yozgi issiq kunlarda organizmda suv tanqisligi juda tez rivojlanadi va salomatlikka jiddiy zarar yetkazishi mumkin. Mutaxassislar bu holatni o‘z vaqtida aniqlash uchun diqqat qilish kerak bo‘lgan belgilarni eslatishmoqda.

Britaniyada o‘tkazilgan so‘rovlarga ko‘ra, odamlar kuniga tavsiya etiladigan 6–8 stakan suvning yarmidan ham kamrog‘ini ichishadi. Bu esa nafaqat organizmni qurishi, balki uzoq muddatli kasalliklarga ham sabab bo‘lishi mumkin. Arizona shtati universiteti professori, gidratasiya fanlari laboratoriyasi rahbari Stavros A.Kavurasning ta’kidlashicha, suv haroratni nazorat qilish, ozuqa moddalarini tashish, chiqindilarni chiqarish va bug‘imlarni moylashda asosiy rol o‘ynaydi, deb yozadi The Telegraph nashri.

Inson organizmining taxminan 60 foizi suvdan iborat. Lekin terlash, peshob chiqarish, nafas olish va boshqa jarayonlar orqali kuniga taxminan 2–2,5 litr suyuqlik yo‘qoladi. Agar ushbu yo‘qotish o‘z vaqtida to‘ldirilmasa, surunkali gipertoniya, diabet, alsgeymer kabi kasalliklarga olib kelishi mumkin.

Professor Kavurasning so‘zlariga ko‘ra, ko‘pchilik odamlar yengil darajada suvsizlangan holda hayot kechiradi va bu holat ularning umumiy ahvoliga sezilarli ta’sir ko‘rsatadi. Eng xavflisi, yoshi kattalar, dori qabul qiladiganlar yoki ich ketishi bo‘lganlar uchun bu holat jiddiy oqibatlarga olib kelishi mumkin.

Har kuni suv yetishmasligining birinchi va eng oddiy belgilaridan biri — kuchli chanqoq hissi. Bu tana og‘irligining ikki foiziga teng suyuqlik yo‘qotilganini anglatadi. Professor Dilip Lobo ta’kidlashicha, bu holatda suv ichish organizmdagi muvozanatni tiklaydi va o‘zini yaxshiroq his qilishga olib keladi.

Suv yetishmovchiligining eng ko‘p kuzatiladigan belgilari shulardan iborat:

• Chanqoq hissi;
• og‘iz quruqligi;
• og‘irlik hissi yoki bosh og‘rig‘i;
• peshob rangining to‘qlashuvi;
• charchoq va diqqatni yo‘qotish;
• mushaklarda og‘riqlar.

Shu sababli, kuniga bir necha marta oddiy suv ichish odatini shakllantirish nafaqat yozda, balki butun yil davomida ham organizm uchun juda muhim hisoblanadi.