Hindistonda COVID-19dan kasallanganlar soni keskin oshib ketdi, o‘lim holatlari ham kuzatildi

Hindistonda COVID-19 holatlarining keskin o‘sishi qayd etildi, ularning umumiy soni 3,395 ga yetdi.

Bu haqda Hindiston sog‘liqni saqlash vazirligi Business Standard gazetasiga ma’lum qildi.

Departament ma’lumotlariga ko‘ra, eng ko‘p kasallanish holatlari Kerala (1336) va Maxarashtra (467) shtatlarida, shuningdek, milliy poytaxt Dehli viloyatida qayd etilgan – 375. So‘nggi 24 soat ichida COVID-19 bilan bog‘liq to‘rtta o‘lim qayd etilgan – Kerala, Karnataka, Uttar-Pradesh va Dehlida. Gujarat, G‘arbiy Bengaliya, Tamilnadu shtatlarida ham infeksiyalar sonining ko‘payishi qayd etildi.

Nashr eslatganidek, o‘tgan haftada mamlakatda COVID-19 bilan kasallanganlar soni 257 nafarni tashkil etgan. Shunday qilib, 10 kun ichida bu ko‘rsatkich 10 barobardan ziyod oshgan.

Mamlakat Sog‘liqni saqlash vazirligi ma’lumotlariga ko‘ra, yangi infeksiya holatlarining aksariyati engildir. Shu bilan birga, rasmiylar fuqarolarni hushyor bo‘lishga va ehtiyot choralarini ko‘rishga chaqirdi - odamlar gavjum joylarda niqob taqish, ijtimoiy masofani saqlash, qo‘l va xona gigiyenasini saqlash.