Germaniya Ukrainada yadroviy xavfsizlik uchun MAGATEga 1 million yevro ajratadi

«Janglar olib borilayotgan hududlarda joylashgan atom elektr stansiyalari jiddiy qo‘shimcha tahdidlarga duch kelmoqda. Bu Rossiya tomonidan egallab olingan Zaporojye AESiga, shuningdek, ishlab turgan Ukraina AESlariga va Chernobil AESi hududiga ham taalluqli. Chernobil AESida himoya inshooti dron zarbasi natijasida jiddiy zarar ko‘rgan», — dedi Germaniya Atrof-muhit vazirligining parlament davlat kotibi Rita Shvarselyur-Sutter MAGATE konferensiyasida.

Shu munosabat bilan, «Ukraina AESlarida xavfsizlikni ta’minlash» va «yadroviy xavfsizlikning og‘ir vaziyati» sharoitida Berlin Atom energiyasi bo‘yicha xalqaro agentlikka (MAGATE) 1 million yevro ajratadi.

Shvarselyur-Sutter Rossiyani Ukrainadagi urushni to‘xtatishga chaqirdi. Shuningdek, u xalqaro hamjamiyatni 2025 yil fevral oyida dron zarbasidan zararlangan Chernobil AESining 4-energobloki ustidagi Yangi xavfsiz konfaynment (NBK) — himoya arkasini ta’mirlash ishlarida ishtirok etishga chaqirdi.

Ukraina rasmiylarining ma’lum qilishicha, Chernobil AESiga zarba bergan dron Rossiyaniki bo‘lgan. Rossiya rasmiylari esa buni rad etmoqda.

Shvarselyur-Sutterning aytishicha, ta’mirlash ishlarida Germaniya tashabbusni o‘z qo‘liga oladi va 50 million yevro ajratish niyatida.