Germaniya Polshadan gumon qilmoqda, Tusk «jim bo‘lishni» so‘radi

«Shimoliy oqim» gaz quvuridagi portlash bilan bog‘liq tergov Germaniya va Polshada keskinlikni keltirib chiqardi.
Iyun oyida Germaniya rasmiylari Boltiq dengizidagi «Shimoliy oqim» gaz quvurini portlatishda gumon qilingan Ukraina fuqarosini hibsga olishga order bergan edi. Ord chiqarilgan vaqtda, gumon qilinayotgan qo‘poruvchilik ishtirokchisi Polshada bo‘lgan, ammo Varshava uni hibsga olmagan va gumondorning Ukrainaga ketishiga ruxsat bergan.

The Wall Street Journal gazetasining yozishicha, bu harakatlar, shuningdek, Polsha Bosh vaziri Donald Tuskning «Shimoliy oqim» tekshiruvi bilan bog‘liq so‘nggi izohlari Germaniyada norozilik uyg‘otdi. Tusk o‘tgan hafta ijtimoiy tarmoqlarda gaz quvurlarining «tashabbuskorlari va targ‘ibotchilari» – ehtimol Germaniyani nazarda tutayotgani – «uzr so‘rashi va jim turishi» kerakligini yozgan.

The Wall Street Journal ma’lumotlariga ko‘ra, Germaniya va Polsha hukumatlari vakillarining joriy yil 2 iyul kuni Varshavada bo‘lib o‘tgan uchrashuvida, go‘yoki polshalik rasmiy nemis hamkasbiga «Shimoliy oqimni» yo‘q qilishi mumkin bo‘lgan barcha gumonlanuvchilar hibsga olinish o‘rniga «medal olishlari kerak» degan. .

Polsha huquq-tartibot idoralari gumonlanuvchini hibsga olmaganliklarini ochiqchasiga aytishdi, chunki ularning nemis hamkasblari uning yashash manzilini Yevropa reestriga kiritmagan. Germaniya rasmiylari buni rad etishdi. O‘shanda Varshava Polsha Ichki xavfsizlik xizmati gumonlanuvchini hibsga olishdan oldin bu masalani ko‘rib chiqishi kerakligini aytgan edi.

O‘tgan hafta Polsha prokuraturasi Germaniyaga yo‘llagan maktubida gumonlanuvchining mamlakatni tark etganini ma’lum qildi. Maktubda, shuningdek, Germaniya huquq-tartibot idoralari xodimlarining polshalik hamkasblari gumonlanuvchining Varshava yaqinidagi uyida tintuv o‘tkazishdan manfaatdor ekanligi muhokama qilingan.
Polsha hibsga olish buyrug‘ini bajarmagani uchun Germaniya rasmiylari xatni «haqorat» deb baholadi.

Shu bilan birga, Rossiya Federasiyasi «Shimoliy oqim» portlashlari bo‘yicha tergovda muvaffaqiyat qozonmaganligi sababli Germaniya ustidan shikoyat bilan murojaat qildi va «Germaniya terrorizmga qarshi kurash bo‘yicha xalqaro majburiyatlarini bajarishi» bo‘yicha muzokaralar o‘tkazishni taklif qildi. Bu haqda Rossiya TIV rasmiysi Oleg Tyapkin ma’lum qildi.

Nemis tergovchilariga ko‘ra, o‘tgan yili Polsha Polshaning Kolobrzeg portida bog‘langan yaxta kuzatuv kameralari tasvirlarini, shuningdek, xuddi shu hududdagi mobil transport ma’lumotlarini taqdim etishdan bosh tortgan.

Polshaning ichki xavfsizlik xizmati ABW har 30 kunda yozuvlarni o‘chirishning standart tartibiga tayanib, o‘shanda bunday yozuvlar yo‘qligini aytgandi.

Ayrim nemis huquq-tartibot idoralari xodimlari va siyosatchilar Polsha rasmiylari ataylab tergovga aralashishga urinayotganini da’vo qilmoqda.

Germaniya, shuningdek, Ukraina Qurolli kuchlarining sobiq bosh qo‘mondoni Valeriy Zalujniyning 2022 yil sentyabrida «Shimoliy oqim»ga putur yetkazishdagi rolini ham tekshirmoqda. Ukraina prezidenti Vladimir Zelenskiy dastlab rejani ma’qullagan, biroq keyin uni bekor qilishni buyurgan. Zalujniy, buyruqqa qaramay, operasiyani davom ettirdi.

2022 yilning 26 sentyabr kuni Boltiq dengizi tubi bo‘ylab Rossiyadan Germaniyaga o‘tuvchi «Shimoliy oqim 1» va «Shimoliy oqim 2» gaz quvurlarida uchta portlash sodir bo‘lib, katta hajmdagi gaz sizib chiqishiga sabab bo‘ldi. Gaz quvurining to‘rtta liniyasidan faqat bittasi buzilmagan.

AQSH, Buyuk Britaniya va Yevropa Ittifoqi hukumatlari maqsadli sabotajni e’lon qildi. Rossiya portlashlardan AQSh va uning ittifoqchilari manfaatdor, deb hisoblaydi. G‘arb va Rossiya ommaviy axborot vositalari turli xil versiyalar haqida yozdilar - ruslarning o‘zlari tomonidan qilingan sabotajdan tortib, Ukrainaning aralashuvigacha. Prezident Vladimir Zelenskiy Ukrainaning sabotajga aloqadorligini rad etadi.

2024 yil fevral oyi boshida Shvesiya yurisdiksiya yo‘qligi sababli «Shimoliy oqim» portlashini tekshirishni to‘xtatdi. Shvesiya ortidan Daniya ham tergovni tark etdi.