Yil boshidan beri kuzatilgan uchta ekstremal issiqlik to‘lqini o‘limlar sonining keskin oshishiga olib keldi. Iyul oyida issiqlikdan vafot etganlarning aksariyati 75 yoshdan oshganlar bo‘lgan.
Fransiyada yil boshidan beri kuzatilgan bir necha g‘ayriodatiy issiqlik to‘lqini fonida 7,3 mingdan ortiq ortiqcha o‘lim qayd etildi. Bu haqda mamlakat Milliy jamoat salomatligi agentligi ma’lumotlari dalolat bermoqda.
24–28 may kunlari kuzatilgan birinchi issiqlik to‘lqini kamida 300 ta qo‘shimcha o‘limga sabab bo‘ldi. Eng og‘ir oqibatlar 17–30 iyun kunlariga to‘g‘ri keldi — bu davrda ortiqcha o‘limlar soni 5764 nafarga yetdi. 3–22 iyul kunlari davom etgan issiqlik paytida yana 1243 ta ortiqcha o‘lim qayd etildi. Bu davrda vafot etganlarning qariyb to‘rtdan uch qismi 75 yosh va undan katta bo‘lgan.
Ortiqcha o‘lim ko‘rsatkichi ekstremal issiqlik davrida amalda qayd etilgan o‘limlar soni bilan odatiy sharoitlarda kutilishi mumkin bo‘lgan o‘limlar soni o‘rtasidagi farq sifatida hisoblanadi. Shu tariqa issiqlik va boshqa favqulodda hodisalarning aholi salomatligiga ta’siri baholanadi.
Bu yil Fransiya meteorologik kuzatuvlar boshlangan 1900 yildan beri eng issiq iyul oyini boshdan kechirdi. Oylik o‘rtacha harorat 24,9 darajaga yetdi.
Shu bilan birga, iyul oyida yog‘ingarchilik tanqisligi 70 foizni tashkil qildi. Oy butun kuzatuvlar tarixi davomidagi eng quruq iyul oylari orasida uchinchi o‘rinni egalladi.
Ekstremal issiqlik va qurg‘oqchilik o‘rmon yong‘inlari xavfini ham sezilarli darajada oshirdi. Mamlakat tarixidagi eng yirik yong‘inlar mavsumi natijasida yil boshidan beri Fransiyada 117 ming gektardan ortiq hudud yonib ketdi.
Toshkentdagi musobaqada Isroil bayrog‘ini ko‘rsatgani uchun isroillik o‘quvchining oltin medali bekor qilindi
Respublikadagi uchta 11-sinfning barcha bitiruvchilari talaba bo‘ldi
AQSh elchisi dunyo boshqaruvini yahudiylarga berish taklifi bilan chiqdi
