«Eurovision»: Isroil sabab to‘rtta davlat tanlovni boykot qildi

Payshanba kuni Yevropa efir uzatuvchilar ittifoqining (EBU) Isroilga «EvrovideniYE-2026»da qatnashish uchun rasmiy ruxsat bergani ortidan musiqa tanlovi atrofida katta bahs va norozilik kelib chiqdi. Irlandiya, Ispaniya, Niderlandiya va Sloveniya bu qarorga qarshi chiqib, kelgusi yili bo‘lib o‘tadigan tanlovni boykot qilishini e’lon qildi.

Qator Yevropa davlatlari Isroilni gumanitar oqibatlarga sabab bo‘layotgan G‘azodagi urush fonida tanlovdan chetlatishni taklif qilgan edi. Bundan tashqari, ular EBUni ovoz berish tizimi bilan bog‘liq ehtimoliy manipulyasiyalar yuzasidan xavotir bildirgan.

Ushbu davlatlar Isroil masalasini EBU umumiy majlisida yashirin ovozga qo‘yishni talab qildi. Biroq Jenevada bo‘lib o‘tgan yig‘ilishda bunday ovoz berish rad etildi va uning o‘rniga kelishuvga asoslangan yangi qoidalar qabul qilindi.

«A’zolarning ko‘pchiligi ishtirokni cheklash bo‘yicha qo‘shimcha ovoz berishga hojat yo‘qligini bildirdi. «EvrovideniYE-2026» rejalashtirilgan formatda, lekin kuchaytirilgan xavfsizlik choralari bilan o‘tkaziladi», – deyiladi EBUning rasmiy bayonotida.

Isroil prezidenti Isaak Gersog EBU qarorini qo‘llab-quvvatlab, uni «Isroilni sukutga cho‘ktirishni istaganlarga qarshi qo‘yilgan birdamlik va do‘stlik ramzi» deb atadi.

Qaror e’lon qilingach, Niderlandiya milliy telekompaniyasi Avrotros tanlovdan chiqishini ma’lum qildi. Ular bu holatni o‘z jamoatchilik qadriyatlari bilan mos kelmasligini aytishdi.

Shundan keyin Ispaniya ham o‘z ishtiroki va translyasiyasini to‘xtatishini bildirdi. Bu esa juda katta ahamiyatga ega, chunki Ispaniya «Katta beshlik» a’zosi sifatida tanlov moliyalashtirilishida eng katta hissa qo‘shuvchilardan biri hisoblanadi.

«Biz na final, na yarim finallarni efirga uzatamiz. Mavjud sharoitda ishtirok etish mumkin emas», – deya bayonot berdi Ispaniyaning RTVE telekompaniyasi.

«EvrovideniYE-2026» hozircha rejalashtirilgan tarzda o‘tkazilishi kutilmoqda, ammo ayrim yirik Yevropa davlatlarining boykoti musiqa tanlovining nufuzi va birdamligiga jiddiy zarba bo‘lishi mumkin. Isroilning qatnashishi atrofidagi siyosiy mojaro tanlovni musiqiy emas, balki geosiyosiy maydonga aylantirib qo‘yayotgani ayni paytda yanada yaqqol ko‘rinmoqda.