Eron AQSh bilan muzokaralarni to‘xtatdi — The Wall Street Journal

Amerikalik nashr ma’lumotiga ko‘ra, Eron Vashington bilan to‘g‘ridan-to‘g‘ri muzokaralarni to‘xtatishga qaror qilgan. Shu bilan birga, Tehron Pokistonga ham endi sulh muzokaralarida ishtirok etmasligini ma’lum qilgan.

Manbalarga ko‘ra, bu qaror so‘nggi keskin bayonotlar va, xususan, AQSh prezidenti Donald Tramp tomonidan bildirilgan tahdidlar fonida qabul qilingan. Ayniqsa, Trampning Eronga nisbatan keskin ritorikasi diplomatik aloqalarga salbiy ta’sir ko‘rsatgan.

Shu bilan birga, nashr qayd etishicha, muloqot jarayoni to‘liq to‘xtab qolmagan. O‘t ochishni to‘xtatish va mojaroni yumshatish bo‘yicha ayrim aloqalar vositachilar orqali davom etmoqda.

Tahlilchilar fikricha, Tehronning bunday qadami muzokara jarayonini yanada murakkablashtiradi va belgilangan muddatlarda kelishuvga erishish ehtimolini pasaytiradi. Biroq tomonlar o‘rtasida bilvosita muloqot saqlanib qolayotgani inqirozni diplomatik yo‘l bilan hal qilish imkoniyati hali ham mavjudligini ko‘rsatadi.