Ijtimoiy tarmoqlarda Samarqand shahridagi dorixonalardan xarid qilingan “Dok-1 Maks” tabletka va sirop dori vositalarini qabul qilgandan so‘ng bemorlarda turli nojo‘ya ta’sirlar kuzatilgani haqida xabarlar tarqaldi.
Farmasevtika tarmog‘ini rivojlantirish agentligi ushbu vaziyatni darhol nazoratga oldi. Bemorlar ahvolini o‘rganish va holat sabablarini aniqlash maqsadida tezkor mutaxassislar guruhi tuzildi.
Uning tarkibiga agentlik hamda Dori vositalari, tibbiy buyumlar va tibbiy texnika ekspertizasi va standartlashtirish Davlat markazining malakali mutaxassislari kiritildi.
Samarqanddagi dorixonalardan xarid qilingan Hindistoning Marion Biotech Pvt. Ltd kompaniyasiga tegishli “Dok-1 Maks” tabletka va limon va asal ta’mli sirop dori vositalari o‘rnatilgan tartibda ekspertizadan o‘tkazilmoqda. Laboratoriya tahlillari yakunlangach, uning natijalari haqida e’lon qilinadi.
Ushbu dori vositalarining yurtimizdagi savdosi 2022 yil 22 dekabrdan vaqtincha to‘xtatildi va bu haqda “Quramax Medical” MCHJ tomonidan realizasiya qilingan tashkilotlarga xabar yuborildi.
Ijtimoiy tarmoqlarda tarqalgan hujjatga va ma’lumotlarga ko‘ra, yuqoridagi dori vositasidan foydalangan 17 nafar bolaning ahvoli og‘irlashgan, 15 nafari vafot etgan.
Bu raqamlar borasida hali rasmiy manbalar ma’lumot bergani yo‘q.
Mutasaddi tashkilotlardan bu borada izoh kutib qolamiz.
Isroil g‘arazli maqsadini e’lon qildi
Dollarning so‘mga nisbatan yangi qiymati ma’lum bo‘ldi
UzAuto Motors 19 dekabr kuni Cobalt uchun kontraktasiyani ochadi
