Chad poytaxti Njamena shahridagi prezident saroyiga qurolli jangarilar tomonidan hujum uyushtirildi

Bu haqda AFP xabar bermoqda.

Hujum “Boko Haram” terrorchilik guruhi jangarilari tomonidan amalga oshirilgan, ushbu guruh avvalroq Chad hukumati nishonlariga hujum qilgan edi.

"Hujumda jami 24 kishi ishtirok etdi, ulardan 18 nafari halok bo‘ldi, oltitasi yaralandi. Bizdan bir kishi o‘ldi, uch nafar odam yaralandi", — deya ma’lum qildi Chad Tashqi ishlar vaziri Abderaman Kulamalla AFP'ga.

Agentlik muxbirlarining xabar berishicha, prezident qarorgohiga olib boruvchi yo‘llar to‘silgan, ko‘chalarda tanklar paydo bo‘lgan. Chad prezidenti Mahamat Debi hujum vaqtida saroyda bo‘lgan. Mahalliy hokimiyat ma’lumotlariga ko‘ra, hozirda vaziyat nazorat ostiga olingan.