Buyuk Britaniya Bosh vaziri Kir Starmer o‘z lavozimidan ketish grafigini tayyorlamoqda

Bu haqda Daily Mail xabar bermoqda.

Mamlakat Bosh vaziri Kir Starmer yaqin ittifoqchilariga iste’foga chiqish niyatida ekanligini va o‘z lavozimini tark etishning tartibli grafigini tayyorlayotganini ma’lum qildi.

Britaniya hukumatidagi manbaning nashrga bildirishicha, Starmer "siyosiy voqelikni tushunib turibdi" va hokimiyat ichidagi hozirgi inqirozni "barqaror ushlab turib bo‘lmaydigan" deb hisoblaydi. Uning so‘zlariga ko‘ra, bosh vazir lavozimidan munosib ravishda va o‘z shartlari asosida ketmoqchi.

Maqolada ta’kidlanishicha, Leyboristlar partiyasi ichida ehtimoliy iste’fo haqidagi bayonotning muddatlari allaqachon muhokama qilinmoqda.

Shu bilan birga, Starmerning ayrim ittifoqchilari uni 18 iyun kuni Meykerfild okrugida bo‘lib o‘tadigan oraliq saylovlarni kutishga chaqirmoqda. Ushbu saylovda bosh vazirlikka loyiq vorislardan biri sifatida ko‘rilayotgan Manchester meri Endi Byornhem o‘z nomzodini qo‘yishi mumkin.

Gazetaning yozishicha, Byornhemning tarafdorlari Kir Starmerning ketishi haqidagi muddatidan oldin beriladigan bayonot saylov kampaniyasini qiyinlashtirib yuborishidan xavotirda. Merning ittifoqchilaridan biri ular uchun saylovlarni quyidagi shior ostida olib borish foydaliroq ekanligini aytgan: "Agar siz Endiga ovoz bersangiz, u Vestminsterga keladi va Starmerni Dauning-stritdan chiqarib yuboradi", – deydi u.

Eslatib o‘tamiz, Leyboristlar partiyasi mahalliy saylovlarda mag‘lubiyatga uchragan edi. Shundan so‘ng bosh vazirning iste’fosi haqidagi masala ko‘tarila boshladi. Ayni paytda Starmerning o‘zi lavozimini tark etish niyati yo‘qligini ma’lum qilgan edi.