Evropa Ittifoqining tashqi ishlar va xavfsizlik siyosati oliy vakili Jozep Borrell Isroil armiyasining G‘azo sektoridagi Xon Yunus shaharchasidagi maktabga uyushtirgan hujumlarini qoraladi. Bu haqda u X ijtimoiy tarmog‘idagi postida ma’lum qildi.
«Qachongacha bu mojaroning og‘irligini begunoh fuqarolar ko‘taradi?» - deb yozgan Borrell va aybdorlar javobgarlikka tortilishi kerakligini qo‘shimcha qilgan.
Evropa diplomatiyasi rahbari asirlarni ozod qilish va gumanitar yordam yetkazib berish uchun zudlik bilan o‘t ochishni to‘xtatishga chaqirdi.
Eslatib o‘tamiz, 9 iyul, seshanba kuni Isroil armiyasi Xon Yunus shahrida tinch aholi bo‘lgan maktabga hujum uyushtirdi, natijada 29 kishi halok bo‘ldi va kamida 53 kishi jarohat oldi.