Berlin 2036 yilgi Olimpiada o‘yinlariga nomzodlik uchun bergan arizasini qaytarib olmoqchi

Berlin rasmiylari Germaniya nomidan 2036 yilgi Olimpiada va Paralimpiya o‘yinlarini o‘tkazishdan bosh tortmoqchi, deb xabar beradi DW.

Berlin Olimpiya komissari Kave Nirumand, shahar meri Kay Vegner va sport bo‘yicha senator Iris Shpranger arizani qaytarib olishga qaror qilishdi.

Shundan so‘ng, Germaniya nomidan Olimpiya va Paralimpiya o‘yinlariga nomzod maqomi uchun faqat Myunxen va Keln/Reyn-Rur hududi kurashadi.

Berlin Brandenburg, Meklenburg-Vorpommern va Saksoniya bilan birgalikda "Berlin+" konsepsiyasi bo‘yicha Olimpiada o‘yinlariga ariza topshirgan edi.

– Germaniya Olimpiya sport federasiyasining baholash komissiyasi Myunxen va Keln/Reyn-Rur loyihalariga Berlin konsepsiyasiga qaraganda yuqori ball berdi. Bundan tashqari, Berlinda Olimpiada o‘yinlarini o‘tkazish uchun ariza bo‘yicha referendum o‘tkazilmagan, — deyiladi xabarda.

Olimpiadada Germaniyani himoya qiladigan shahar yoki hudud 26 sentyabr kuni Baden-Badenda aniqlanadi. 42 ta Olimpiya sport federasiyasi, shuningdek, Germaniya Olimpiya sport ittifoqining prezidiumi va alohida a’zolari ovoz berishadi.

Tanlangan Germaniya nomzodi keyin Xalqaro Olimpiya qo‘mitasi doirasidagi tanlov jarayonida ishtirok etadi. 2036 yilgi Olimpiya o‘yinlari o‘tkaziladigan joy haqidagi qaror uch yildan keyin qabul qilinadi.