Muxolifat Damashqni egallab, Bashar al-Assad rejimini ag‘darganidan so‘ng 4 mingdan ortiq suriyalik askar Iroq chegarasini kesib o‘tdi, deya xabar bermoqda Associated Press (AP).
Iroq milisiyasi rasmiylariga ko‘ra, suriyalik askarlar qurol-yarog‘, o‘q-dorilar va zirhli mashinalarini topshirib, so‘ngra noma’lum joyda joylashgan lagerga joylashtirilgan.
Iroq xavfsizlik xizmati ma’lumotlariga ko‘ra, yakshanbaga o‘tar kechasi Suriyaning Hasaka viloyati gubernatori boshpana izlayotgan askarlar kolonnasi bilan chegaraga yetib kelgan. Guruhga Al-Qoim nazorat punkti orqali Iroqqa kirishga ruxsat berildi va Iroq tomoni ham Suriya harbiylarining kirib kelishiga to‘sqinlik qilmadi, bu esa mintaqaviy kuchlar muvozanatidagi jiddiy o‘zgarishlardan dalolat beradi.
Anonim Iroq AP manbalarining ta’kidlashicha, Bag‘dod betaraflikni saqlab, Suriyaning yangi hukumatlariga nisbatan ehtiyotkor pozisiyani egallaydi.
