AQShda salkam yarim million kishi bo‘ron sabab elektrsiz qoldi

PowerOutage.us ma’lumotlariga ko‘ra, Qo‘shma Shtatlarda 428 000 dan ortiq odam qor bo‘roni tufayli elektrsiz qoldi.

Fox News xabar berishicha, bo‘ron Amerika aviakompaniyalarini to‘rt kun ichida 16 000 dan ortiq reyslarni bekor qilishga majbur qildi.

The Washington Post xabariga ko‘ra, AQShning kamida 22 shtati qishki bo‘ron tufayli favqulodda holat e’lon qildi. Bugun ertalab janubi-sharqdagi ba’zi shaharlarda muzli yomg‘ir yog‘di.

Milliy ob-havo xizmati ma’lumotlariga ko‘ra, Kanzas-Siti 24 yanvar kuni 70 yil ichidagi eng yuqori kunlik qor yog‘ishini qayd etdi — taxminan 13 sm. Avvalgi maksimal ko‘rsatkich taxminan 5,5 sm edi.

Sinoptiklar AQShda qor yog‘ishi va muzlash davom etishini, bu esa keng ko‘lamli elektr va transport uzilishlariga olib kelishini bashorat qilmoqda, deb xabar beradi Fox News. Bo‘ron yana bir necha kun davom etishi kutilmoqda.