Amerikalik sayyohlarni olib ketayotgan samolyot Keniya shimolidagi qo‘riqxonaga qo‘nayotganda jirafa bilan to‘qnashib ketdi.
Bu haqda mahalliy KahawaTungu internet nashri xabar berdi.
Ma’lumotlarga ko‘ra, bitta dvigatelli samolyotning uchuvchisi va besh yo‘lovchisi jabrlanmagan, biroq jirafa samolyot parvonasidan olgan jarohatlar tufayli vafot etgan.
"Uchuvchi samolyotni uchish-qo‘nish yo‘lagi bo‘ylab ketayotganida, ikki jirafa butalardan yugurib chiqib, qo‘nish trayektoriyasini kesib o‘tib, to‘qnashuvga sabab bo‘ldi”, — deb yozadi nashr.
Ikkinchi jirafa uchish-qo‘nish yo‘lagini kesib o‘tib, qochishga muvaffaq bo‘ldi. Polisiya va Keniya fuqaro aviasiyasi boshqarmasi hodisa yuzasidan tergov olib bormoqda.
