AQSh Grenlandiyani sotib olish xarajatlarini hisoblab chiqmoqda

Oq uy Grenlandiyaning AQShga qo‘shib olinishi xarajatlarini baholamoqda – The Washington Post.

Gazetaning ikki suhbatdoshiga ko‘ra, Oq uy byudjet boshqarmasi xodimlari Grenlandiya sotib olingan taqdirda uni saqlashning potensial qiymatini, jumladan, uning 58 ming aholisi uchun davlat xizmatlarini ko‘rsatish harajatlarini baholashga harakat qilmoqda.

Shuningdek, AQSh ma’muriyati Grenlandiyaning tabiiy resurslaridan qancha daromad olish mumkinligini aniqlashga harakat qilmoqda.

"Agar biz Grenlandiyani sotib olsak, Qo‘shma Shtatlar uchun xarajatlar va foyda qanday bo‘lishi haqida munozara ketmoqda", – deya izoh berdi Oq uyning anonim rasmiysi.

Uning so‘zlariga ko‘ra, xarajatlar tahlili "grenlandiyaliklarning Qo‘shma Shtatlarga qo‘shilish uchun ovoz berishi va buni qo‘llab-quvvatlashi" ssenariysiga asoslanadi.