AQSh Eronning Hormuz bo‘g‘ozini nazorat qilishini qabul qilib bo‘lmaydigan ssenariy deb hisoblamoqda

Eronning Hormuz bo‘g‘ozini nazorat qilishi Vashington uchun qabul qilib bo‘lmaydigan ssenariydir.

Bu haqda AQSh energetika vaziri Kris Rayt CNBC telekanaliga bergan intervyusida ta’kidlab o‘tdi.

"Xalqaro hamjamiyat hech qanday holatda Eronning Hormuz bo‘g‘ozini nazorat qilishiga yo‘l qo‘ymasligi kerak, bu so‘nggi o‘n yilliklarda vaqti-vaqti bilan sodir bo‘lganidek. Bizga bo‘g‘oz orqali to‘siqsiz yuk tashishning qat’iy kafolatlarini ta’minlaydigan natija kerak - bu nafaqat Qo‘shma Shtatlar, balki barcha Fors ko‘rfazi davlatlari, Osiyo va Yevropa mamlakatlari va butun xalqaro hamjamiyat manfaatlariga mos keladi", deb ta’kidladi Rayt.

Avvalroq AQSh prezidenti Donald Tramp Vashington va Tehron o‘rtasida davom etayotgan muzokaralarda kelishuvga erishilgan taqdirda Hormuz bo‘g‘ozi darhol qayta ochilishiga ishonch bildirgan edi. Uning so‘zlariga ko‘ra, Vashington Tehron bilan Yaqin Sharqdagi mojaroni "to‘liq hal qilish" bo‘yicha "juda yaxshi" muzokaralar olib borgan. Eron o‘z navbatida AQSh bilan to‘g‘ridan-to‘g‘ri aloqada bo‘lmaganligini da’vo qilmoqda.