25 iyun kuni Oliy Majlis Senatining Mudofaa va xavfsizlik masalalari qo‘mitasi majlisida Ichki ishlar vazirligi Yo‘l harakati xavfsizligi xizmati, Transport, Maktabgacha va maktab ta’limi vazirliklari hamda Bosh prokuratura va Hisob palatasi mas’ul rahbar xodimlarining yo‘llarda xavfsizlikni ta’minlash va o‘lim holatlarini kamaytirish bo‘yicha amalga oshirilayotgan ishlar bo‘yicha axboroti eshitildi.
Qayd qilinishicha, yo‘l-transport hodisalarining oldini olish maqsadida 2023 yilda respublika bo‘yicha qariyb 8 mingta ob’ektda umumiy qiymati 13,5 trln so‘mlik qurilish ishlari bajarilgan. Natijada, joriy yilning 5 oyi davomida yo‘l-transport hodisalari soni 7,2 foizga, tan jarohati bilan bog‘liq holatlar 8,7 foizga kamaygan.
Shu bilan birga, yo‘l-transport hodisalarining 57 foizi yo‘l infratuzilmasidagi kamchiliklar hamda 43 foizi haydovchi tomonidan yo‘l harakati qoidalariga rioya qilmaslik oqibatida sodir etilgan. Hodisalarning 53,7 foizi piyoda va velosipedchilar bilan bog‘liq holatlar hissasiga to‘g‘ri kelgan.
Ta’kidlanishicha, umumiy o‘rta ta’lim maktablarining 9548 tasi transport qatnovi ko‘p hududlarda joylashgan va aksariyat maktablar oldida piyodalar uchun yo‘laklar mavjud emas, tegishli svetoforlar o‘rnatilmagan. Oqibatda joriy yilning 5 oyi davomida jami 359 nafar o‘quvchi bilan bog‘liq yo‘l-transport hodisasi sodir etilgan va 65 nafar o‘quvchi halok bo‘lgan, 294 nafar o‘quvchi esa turli darajada tan jarohati olgan.
Yo‘llarda yo‘lovchilar xavfsizligini ta’minlash yuzasidan ta’sirchan nazorat to‘liq va samarali o‘rnatilmaganligi sababli 2023 yilda jami 16 milliondan ortiq qoidabuzarlik qayd etilgan.
Sodir etilgan 9839 ta yo‘l-transport hodisasi oqibatida 9209 nafar fuqaro jarohatlangan va 2282 nafar fuqaro halok bo‘lgan.
2023 yilda bolalar bilan bog‘liq 1794 ta yo‘l-transport hodisasi sodir etilib, ularda 1 568 nafar bola jarohatlangan va 263 nafar bola halok bo‘lgan. O‘lim bilan bog‘liq yo‘l-transport hodisalarining salmog‘i Samarqand, Toshkent (80 tadan), Farg‘ona (69 ta), Qashqadaryo va Surxondaryo (53 tadan) viloyatlarida hamon yuqori ekani qayd etilgan.
Muhokamadan so‘ng Mudofaa va xavfsizlik masalalari qo‘mitasining ushbu kamchiliklarni bartaraf etishga qaratilgan aniq takliflari aks etgan qarori qabul qilingani ta’kidlanmoqda.
Krishtianu Ronaldu 1000 ta golning yaqinaga ham bora olmaydi
«Buni hech qachon ko‘rmagansiz» - Shimoliy Koreya askarlari Ukraina urushida FPV kamikadze dronlarining g‘azabiga duch keladi
Turkmanlar ustidan nazorat kuchaytiriladi: Ular mamlakatdan chiqib ketmoqda
