Ayrim toifadagi ichki ishlar xodimlari va oila a’zolariga uy beriladi

Hukumatning tegishli qaroriga ko‘ra (543-son, 28.08.2025 yil), ayrim toifadagi ichki ishlar organlari xodimlari va pensionerlariga ularga berilgan xizmat uy-joylari xususiylashtirib beriladi.

Hukumatning 543-sonli qaroriga binoan, 2022 yil 4 iyulga qadar xizmat muddatini to‘liq o‘tab, pensiyaga chiqqan yoki xizmat davrida kasallik sabab rezervga yoki iste’foga chiqarilgan ichki ishlar organlari pensionerlari uy-joy bilan ta’minlanishi mumkin.

Bu huquq ularning oila a’zolariga ham taalluqli, agar ularning nomida shaxsiy turarjoy mavjud bo‘lmasa.

Shuningdek, vafot etgan xodimlar va pensionerlarning oila a’zolari ham ushbu imtiyozdan foydalanishlari mumkin. Qarorga ko‘ra, uy-joylar davlat hisobidan ularning mulki sifatida rasmiylashtiriladi.

Ta’kidlanishicha, mazkur tartib ichki ishlar tizimida uzoq yillar xizmat qilgan, ammo shaxsiy uy-joyga ega bo‘lmagan xodimlar va ularning yaqinlarini ijtimoiy qo‘llab-quvvatlashga qaratilgan.

Qonunchilikka kiritilgan ushbu o‘zgarish ichki ishlar organlari tizimida xizmatni obro‘li qilish va kadrlarni ijtimoiy jihatdan ta’minlashda muhim ahamiyat kasb etadi.