Kaliforniyadagi yong‘in 28 ming gektardan ortiq maydonni qamrab oldi

Kaliforniyaning San-Luis-Obispo okrugidagi Madre o‘rmon yong‘ini 28,6 ming gektardan (70,8 ming akr) ortiq maydonni qamrab oldi.

Bu haqda mahalliy yong‘in xavfsizligi boshqarmasi ma’lum qildi.

Rasmiylar bir necha tuman aholisini evakuasiya qilishni buyurgan. Qurbonlar haqida hozircha ma’lumot yo‘q. Yong‘in sabablari hozircha aniqlanmagan. Hozirda yong‘in 10 foizga o‘chirilgan.

Bu yil boshidan beri Kaliforniyadagi eng yirik yong‘indir. Yanvar oyida Iton va Palisades o‘rmon yong‘inlari Los-Anjeles okrugini qamrab oldi, ularning umumiy maydoni 16 ming gektardan oshdi. Yong‘in 30 kishining o‘limiga olib keldi va 12 mingdan ortiq binolar, shu jumladan taniqli shaxslarning mulki vayron bo‘ldi.