“Magic City” bog‘ida o‘z joniga qasd qilish sahnasi namoyish etilgan tomosha yuzasidan Bolalar ombudsmani tekshiruv so‘radi

Ijtimoiy tarmoqlarda Toshkent shahrida joylashgan “Magic City” bog‘ida namoyish etilgan teatrlashtirilgan tomoshaning videolavhasi tarqaldi. Unda o‘z joniga qasd qilish sahnasi sahnalashtirilgani aks etgan. Eng xavotirlisi — ushbu tomoshada kattalar bilan bir qatorda yosh bolalar ham ishtirok etgani ma’lum qilindi.

Shu munosabat bilan, O‘zbekiston Respublikasi Bolalar ombudsmani holat yuzasidan rasmiy bayonot bilan chiqdi.

Ma’lumot uchun:

• “Bolalarni ularning sog‘lig‘iga zarar yetkazuvchi axborotdan himoya qilish to‘g‘risida”gi Qonunning 16-moddasiga ko‘ra, bolalarni o‘z joniga qasd qilishga undaydigan axborot mahsulotini tarqatish taqiqlanadi.

• 19-modda esa jamoat joylarida bunday axborotni ko‘rsatish uchun maxsus himoya choralari va texnik vositalar zarurligini belgilaydi.

• Shuningdek, Vazirlar Mahkamasining 2014 yil 29 iyuldagi 205-son qarori bilan tasdiqlangan “Ommaviy tadbirlarni o‘tkazish qoidalari”ning 59-bandiga ko‘ra, odamlar hayoti va sog‘lig‘iga tahdid soluvchi har qanday harakat taqiqlanadi.

Bolalar ombudsmani quyidagi choralarni amalga oshirdi:

1. “Magic City” direksiyasidan mazkur voqea yuzasidan rasmiy munosabat bildirish yoki tushuntirish berishni so‘radi;

2. Qonunbuzilish holati mavjudligi yoki yo‘qligini o‘rganish va zarur bo‘lsa, qonuniy choralar ko‘rish uchun prokuratura organlariga murojaat yo‘lladi.