Ispaniya Isroil kompaniyasi bilan yirik kelishuvni bekor qildi

Ispaniya Isroilning G‘azo sektoridagi urushiga norozilik sifatida Isroil kompaniyasidan 15,3 million dona o‘q-dorilar buyurtmasini bekor qildi.

Biroq hukumatning bu harakati Ispaniya fuqarolik gvardiyasini o‘q-dorisiz qoldiradi, deb yozadi The Guardian.

Pedro Sanches boshchiligidagi Ispaniya hukumati 2023 yil oktyabr oyida Isroilning G‘azo sektorida boshlangan harbiy amaliyotiga javoban ushbu davlat bilan qurol-yarog‘ sotish bo‘yicha har qanday kelishuvdan bosh tortgan edi. Biroq, bir yil o‘tgach, Ispaniya Ichki ishlar vazirligi nihoyat Isroilning IMI Systems kompaniyasi bilan 15,3 million dona 9 millimetrli snaryadlarni yetkazib berish bo‘yicha shartnoma tuzdi.

Bir necha kundan keyin OAV bu haqda xabar topdi va Ichki ishlar vazirligi kelishuvni bekor qilishga va’da berdi.

Shunga qaramay, 23 aprel kuni Ichki ishlar vazirligi ushbu shartnomani bajarish istagi borligini e’lon qilgan. Vazirlik dalil sifatida shartnomani bunday kech bosqichda bekor qilish Isroil tomoni so‘ragan to‘liq summani (6,6 million yevro) to‘lashiga olib kelishini, Ispaniya esa hech qanday qurol olmasligi bilan izohladi. Bundan tashqari, Ichki ishlar vazirligining ta’kidlashicha, ta’minotning uzilishi fuqarolik gvardiyasining mamlakatda qonun va tartibni saqlash qobiliyatiga salbiy ta’sir qiladi.

Ichki ishlar vazirligining bayonoti Yolanda Diasning so‘l qanot Sumar partiyasining shiddatli noroziligiga sabab bo‘ldi va ular Isroildan o‘q-dorilarni sotib olish rejasini mamlakat hukumati ichidagi kelishuvlarni “qo‘pol ravishda buzish” ekanligini aytdi. Bugun, 24 aprel kuni Sanches va Dias vakillari shartnoma oxir-oqibat bir tomonlama bekor qilinishini ma’lum qilishdi.