Зеленский: "Вашингтон Европанинг ягона позициясини эшитиши муҳим"

Европанинг ягона позицияси Вашингтонда аниқ эшитилиши ниҳоятда муҳим.

Бу ҳақда Украина президенти Владимир Зеленский ўзининг Telegram-каналида Европанинг бир қанча давлатлари раҳбарлари билан онлайн учрашув якунида ёзди.

Украина раҳбари полшалик ҳамкасби Карол Навроскийга мезбонлик қилгани учун миннатдорлик билдириб, муҳокамаларни “йирик дипломатик тадбирлар арафасида позицияларни синхронлаштириш учун қимматли имконият” деб атади.

“Шунингдек, Дания Бош вазири Метте Фредериксен, Литва Президенти Гитанас Науседа, Эстония Президенти Алар Карис ва Латвия Президенти Эдгарс Ринкевичсга кеча тунда Россиянинг зарбаси муносабати билан қўллаб-қувватлаган сўзлари ва самимий ҳамдардликлари учун миннатдорчилик билдираман. Шунингдек, F-16 ҳалокатидан чуқур қайғудамиз. Польшалик учувчи ҳалок бўлди, бизнинг қалбимиз марҳумнинг оиласи ва яқинлари билан”, — деди Зеленский.

Унинг таъкидлашича, томонлар Украинада тинчликка эришиш учун Россия Федерациясига кўпроқ босим ўтказиш бўйича умумий позицияни белгилаб олишган.

"Санкциялар самарали ва столда қолиши керак. Москванинг етакчилар форматида иштирок этишдан бош тортишига жавобан аниқ қарорлар қабул қилиниши керак.

Европанинг умумий позицияси Вашингтонда аниқ эшитилиши учун биз елкама-елка ишлаган ҳолда доимий мувофиқлаштиришни давом эттиришимиз ниҳоятда муҳим”, - дея хулоса қилди Украина президенти.